JUDAS：《ART呃》，神戲劇場製作，JUDAS看的是2021年8月20日的場次。
不知道大家有沒有印象，《ART》這個劇本其實在香港已上演過幾次，曾譯作《望框框的男人》、《男磨坊》，以及最中性的《藝術》。雖然做過很多次，有一次還有男神黃子華演出MARC一角。但不知為何，JUDAS入場的那場，觀眾仍然對劇本一無所知，在MARC用箱頭筆畫花了畫作之後，就以為戲已經完結，到三人抹畫時，就全場拍手，好像很不喜歡劇作，終於完了趕瘟神似的。
劇本很簡單，就是三個大男人，為了一幅畫究竟算不算是藝術抝來抝去、扭來扭去，由畫作是否動人講到三個人之間有沒有成長、有沒有進步、再說到三個之間有沒有朋友間應有的尊重。微言、大義。我想劇作者Yasmine Reza應該在劇評界「食過很多屎」，反正我寫乜你哋都鬧，今次我就特登寫張白紙，任你interpret，國王的新衣，擺明串你哋，係又點？
就是因為劇本本來就是想說「藝術」的可詮譯性，包含無限解讀的可能性，當劇名選擇了強烈指向性的「呃」，就只留低兩個plot俾觀眾： 「這幅畫是騙人的嗎？」、「朋友之間應該呃呃氹氹友誼永固嗎？」係得嘅，不過這個戲可讀性咁高，你真係要做到咁低手咩？真係咩？
第一個要鬧的當然是作為團隊的領導人的導演。張銘耀的眼高手低都聞名遐邇嘅，今次拎到呢個咁witty、咁人性、咁男人同時又細膩嘅劇本，竟然做到咁鬆散，最慘係三個演員的狀態、energy level ，甚至對劇本對角色的理解，都唔aligned，都可算奇葩。燈光和舞台設計都係有咁低手得咁低手，乜都要多，演員喺同對手鬥完咀之後要轉身向觀眾monologue咪monologue囉，導演要演員特登行出嚟，特製一個set加個燈框俾佢，話俾全世界聽「依家佢係焦點」，都算，仲要佢支咪特登加迴音扮心聲！小學禮堂舞台劇嚟㗎喎大佬？
三個演員都各有瑕疵。黃秋生一企出嚟，就已經是大大句字幕「大家都知我最好戲啦，不過今次我唔搶foc喇，留返俾啲後生」寫喺頭頂，扮內斂，結果我只係見到一個完全唔focus，連眼神都係渙散嘅演員。有人話黃秋生最好睇係掟果仁嗰段，起碼見佢真係玩緊，對眼係集中嘅。計我話，佢最精彩係拎膠樽爆樽嗰段，嗰段明顯冇排，見到佢拎住支膠樽喺朱栢康身邊撩撩吓，扮晒要打陳淑儀，然後喺一個最唔啱嘅timing「扮唔小心」扑咗落去朱栢康度，然後朱栢康要react to 嗰吓細到連去捽腳都會忍唔住鬧個技師駛唔駛咁hae然後舉手彈鐘嘅力度。但朱栢康竟然暈低咗。而黃秋生喺呢一段，係充滿comment，係充滿嗰種「既然你用鳩choice，我就鳩做，睇吓邊個鳩啲」嘅張力，勁鳩、勁好睇。
朱栢康真是慘，佢好努力，努力去搏滿堂掌聲，佢為咗演繹Yvan 呢個角色，真係成個瘦咗。佢一個做晒未婚妻、生母、繼母、未婚妻繼母當然娛樂性豐富，最多掌聲亦在那一刻。但你要留意，三個人裹面得一個努力係冇用嘅，點解要交俾一個唔係帶戲嘅角色去做最搏掌聲嘅一個？要佢去做小丑？
陳淑儀演Serge一點點都不似外科醫生（不論身形、形態及形體），連最簡單嘅拎幅三百萬嘅畫出嚟，幅畫一啲都唔似三百萬，就咁吊吊揈拎出嚟、吊吊揈拎返入房，掉以輕心。唔好睇少呢種掉以輕心，呢種掉以輕心就代表呢幅畫喺佢心目中係冇重量嘅，而就係當佢最後拎支箱頭筆出嚟俾Marc嘅時候，呢一幅冇重量嘅畫，畫花佢，有乜重要？朋友比心目中嘅藝術重要？my ass！
想想，Yasmine Reza還真是慘，之前幾次正正經經高水平演出時觀眾不上心，這次不算佳作卻得到好反應。可想而知，在香港，好的劇本本來流通量就不足，養不起劇場人。
依家我哋居住嘅地方，已經夠晒只得一種解讀嘅方法，如果連睇劇，都只有一種解讀方法，未免太過淒慘，而今次呢個慘，我blame張銘耀、我blame黃秋生、我blame神戲劇場。
最後，就真係要講句難聽嘅真心話。真的不要說什麼「創作自唔自由」住，就算是在劇場很自由的時候，你有冇支持過先？有冇睇過先？有冇鼓勵過劇場進步先？如果冇，咁唔係好自由嘅時候，哭什麼喪？如果你係支持嘅，無論幾鳩嘅劇，睇吓佢，評吓佢，甚至笑吓佢，起碼等人知道自己有人睇吖好冇？
不要讓劇場人太灰心，好嗎？
十二門徒 ﹣ 看戲、評戲、感受戲 